Resipi
Mari Bikin Bintanok Jagung
Tahukah kamurang, urang Rungus ada ni satu jenis kuih yang sadap sehingga menjilat piring? Nah, ni hari walaupun panas terik tu matahari.. tapi hati sia baik juga. Jadi sia mau share lah kunun cara-cara bikin ni kuih yang dinamakan ‘Bintanok Jagung’.
Terlampau sinang bikin, sia tutup mata pun buli kenen bikin ni
(Perhatian: Keupayaan menutup mata ini adalah warisan keturunan. Jangan dicuba kalau teda skill)
(Gambar dipinjam daripada Forever Tulip abis tamu Donggongon macam teda boh gia jual jagung sikarang
– ndak la dapat sia bikin)
Bahan-Bahan:
– Jagung (jangan pakai yang tua, kio)
– Gula (secukup rasa. tapi sia suka yang organic ka boh)
– Kulit Jagung yang paling cantik
– Sedikit air
– Mangkuk
– Sinduk
– Dapur gas (kalau teda, pakai kompor pun ok)
– Tempat kasi kukus
– Yang untuk kasi parut
Cara Membuatnya:
1. Kasi parut tu jagung-jagung pakai yang besi untuk kasi parut kelapa tu. Kalau malas, pakai blender pun buli tapi rasa dia tidak sehebat yang manual parut.
2. Gaul sama gula & air.
3. Cuba try kalau manis ka tidak. Kalau manis, ok laitu. Kalau tidak manis, bah kasi tambah la bah gula. Ishh, itu pun mau di kestaw.
4. Masukkan bahan gaulan dalam kulit jagung yang tadi sia bilang kasi pilih yang cantik tu? Kemudian kasi lipat dia cantik-cantik supaya ndak terkeluar nanti sana lanjang.
5. Kukus 10 hingga 15 minit. Tinguk berapa kuat api kau lah.
Hasilnya cenggini….
(sia pinjam lagi ni gambar dari si Forever Tulip. pandai mangkali dia ni memasak oh kan??)
NAHHHHH KANNNN!!! Sadap ni tau!! Kau cuba dulu, mesti kau mau buat lagi.
ennorplenetzurah
01/01/2015 at 8:30 AM
haloooouuuu…. siok ooo ko punya blog ni… hahaha sya ernah buat ni… anak2 sya punyala suka… kadang2 siok tingu durang makan masakan dusun sya. sebb gia bapa durang bajau+bisaya.sampai anak sya suruh lagi bikin. nanti sya mo bikin tu nasi kena masak sama guol (keladi) masjk dalam daun. apa bha nama dia tu sya lupa. padahal mama sya pernah jual sana tamparuli. hihihi bha nnti sya dtg lagi. peace… n hepi new year2015
PikaBoo
26/01/2015 at 5:30 PM
Haloooouu! Ui, sia belum pernah try nogi tu nasi masak sama guol. Kalo ada resepinya, bagi² bah.. 😀
BibieArianna
12/02/2015 at 1:54 AM
Pernah mkn ni dolu2 time masi budak2..
Poingkaa
Naga Yang Lapar
12/02/2015 at 2:10 AM
Bikin ba! Tunjuk kami!
Maimonah Bongsu
14/07/2019 at 9:46 PM
Guna jagung manis bole kah
Kay Kastum
21/07/2019 at 8:19 PM
Buli saja itu
Akinabalu
08/07/2015 at 2:35 PM
mau test nie 1 kali..kalau jadi nanti sis share gambar dia…:)
Pingback: 6 Makanan Di Sabah Yang Kawan Kau Mungkin Inda Pernah Dingar Tapi Sedap » Orang Sabah
Maimonah Bongsu
14/07/2019 at 9:48 PM
Guna jagung manis bole kah
Pingback: Kerepek Pisang Chipsmu, Kenapa Saya Tidak Boleh Berhenti Makan »